Яшь язучылар өчен «Яңа исем» иҗат лабораториясенең өченче сезонында Гран-при ияләре игълан ителде. Бу хакта «Татар-информ» хәбәр итә.
Җиңүчеләр Г.Камал театры бинасында камера залында бүләкләнде.
Гран-прига «Эт типкесендә» әсәре өчен Ихтыяр Кыямов, проектта шигырьләре белән катнашкан Тәнзилә Галимуллина лаек булды.
Татарстан китап нәшриятының генераль директоры, язучы Рөстәм Галиуллин Гран-при ияләренә 2027 елда китап бастыру өчен сертификат тапшырды.
Чара яшь авторлар һәм Кариев театры артистлары катнашында әдәби-музыкаль перформанс белән башланды. Аннары һәр остазның шәкертләренә «Татмедиа» АҖ генераль директоры Шамил Садыйков дипломнар тапшырды.
Быелгы сезонда остазлар буларак яшьләр белән Ләбиб Лерон, Галимҗан Гыйльманов, Ландыш Әбударова, Гөлүсә Батталова эшләде.
Сүз уңаеннан, хәзерге вакытта Татарстанда «Яшьләр һәм балалар» илкүләм проекты гамәлгә ашырыла.
