Татарстан Республикасының Электрон мактау тактасын ел саен яңартачаклар. Бу хакта ТР Хезмәт, мәшгульлек һәм социаль яклау министры Эльмира Зарипова хәбәр итте.
Ведомство башлыгы сүзләренчә, проектны эшләтеп җибәрү һәм кандидатларны тәкъдим итү һәр яз саен узачак. Инициатива профсоюз, хезмәт коллективы яки участок җитәкчелегеннән чыгарга мөмкин. Кандидатлар өчен төп шартлар булып кимендә өч ел хезмәт стажы һәм дисциплинар җәзалар булмау санала.
«Әлбәттә, электрон тактаның мәгънәсе – ел саен үз хезмәте белән мактаулы электрон тактада булу хокукына лаек булган кешеләрнең яңа исемнәрен күрү», — дип ассызыклады Зарипова.
Электрон мактау тактасын булдыруда 5 меңгә якын эре һәм кече оешма-предприятие катнашты. Алар 15 меңнән артык хезмәткәрне тәкъдим итте. Алар арасында хөрмәткә лаек ветераннар, тәҗрибле белгечләр, махсус хәрби операция ветераннары бар. Электрон мактау тактасы белән биредә таныша аласыз.
Сүз уңаеннан, хәзерге вакытта Татарстанда “Кадрлар” илкүләм проекты гамәлгә ашырыла.
