1 июньдә Казанда санитар чистарту һәм төзекләндерү буенча икеайлык тәмамлана. Бу вакыт эчендә коммуналь хезмәтләр һәм меңләгән шәһәр халкы 22,5 млн кв. метрдан артык урамнарны, 17,4 млн кв. метр юл буендагы яшел полосаларны һәм 600 гектарлап җәмәгать киңлекләрен тәртипкә китерде.
Бүген бу хакта «эшлекле дүшәмбе» киңәшмәсендә Тышкы төзекләндерү комитеты рәисе Альберт Шәйнуров сөйләде.
Ике айлык барышында шәһәрдән 296 мең куб. м чүп чыгарылган, дистәләгән чүплекләр бетерелгән. 3,9 мең ишегалды тәртипкә китерелгән. Моннан тыш, икеайлык кысасында 131 километрдан артык куркынычсызлык коймалары юылган, 55 меңләп юл билгесе һәм 1,2 меңнән артык тукталыш павильоны тәртипкә китерелгән. Комитет рәисе сүзләренчә, рөхсәтсез чүплекләргә каршы көрәшкә аерым игътибар бирелгән. Гомумән алганда, шәһәр полигоннарына икеайлык чорында 296 мең куб. м төрле калдыклар чыгарылган.
– 25 апрельдә узган гомумшәһәр өмәсе төп вакыйга булды. Анда 50 меңгә якын кеше, шулай ук 4,3 меңнән артык предприятие һәм учреждение хезмәткәрләре катнашты. Өмә нәтиҗәләре буенча 9 мең куб. метрдан артык чүп-чар җыелды. Биредә теләгән һәркем катнаша алды. Моның өчен «Минем Казан» порталында махсус бүлектә гариза калдырырга һәм мөстәкыйль рәвештә җыештыру урынын сайларга кирәк иде, – диде Альберт Шәйнуров. Сервисның ике атна эшләү дәверендә генә дә аерым мәйданчыклар өчен 1 меңнән артык катнашучыны үз эченә алган 130 дан артык гариза кергән.
Быел Казанның парк һәм урамнарына Себер эрбете утыртыла. Ике ай эчендә 190 агач утыртып өлгергәннәр дә инде. Хәзер бу агачларны Урицкий һәм Савиново паркларында күрергә мөмкин.
– 16 майда «Зөбәрҗәт» күлендә «Чиста уеннар» булып узды, алар 450 катнашучыны берләштерде һәм 307 капчык чүп җыярга мөмкинлек бирде. Экологик акция йомгаклары буенча эшкәртүгә 3 тоннадан артык калдык җибәрелде. Бу ике айда шәһәрдә чисталык урнаштыруга күпләр үз өлешен кертте. Чараларның тулы бер сериясен район администрацияләре, Тышкы төзекләндерү комитеты, Парклар һәм скверлар дирекциясе, Экология министрлыгыннан коллегаларыбыз, шәһәр бергәлекләре, бизнес вәкилләре, учреждениеләр, предприятиеләр һәм идарәче компанияләр үткәрде. Ә аларга безнең иң җаваплы кешеләребез – шәһәр халкы кушылды. Без үз чиратыбызда һәркемгә рәхмәт белдерәбез, – дип тәмамлады сүзен Альберт Шәйнуров.
Башкарма комитет җитәкчесе Рөстәм Гафаров, үз чиратында, нәтиҗәләр чыннан да күренә, дип белдерде. «Тулаем алганда, шәһәрне кышкы пычрактан чистарттык. Хәзер шәһәрне яшелләндерү, берьеллык чәчәкләр утырту эше алып барыла. Тагын нибары бер-ике атнадан шәһәр тулысынча чәчәккә күмеләчәк», – диде Гафаров.
