Ул дүрт өлештән торачак һәм 5-9 нчы сыйныф укытучылары һәм укучылар өчен. “Мәгълүмат гадиләштереп бирелгәнлектән, башлангыч сыйныфларда да куллану мөмкин”, – ди проект авторлары.

Ул үз эченә мәктәп дәреслекләренә кертелгән 30га якын татар язучыларын һәм аларның тормыш юлы, танылган әсәрләре турындагы мәгълүматны туплаган. Бу хакта журналистларга матбугат конференциясендә сөйләделәр.

Берләшмәнең башкарма директоры Алсу Низамиева сүзләренә караганда, “Әдәби нурлар” укытучылар белән бергә эшләнгән. Анда язучылар турында әдәбият дәреслекләренә кертелмәгән кайбер кызыклы мәгълүматлар да урын алган. “”Хәзер балалар инша яза белми,” — диләр. Әлеге карталарны инша язу өчен схема итеп тә кулланырга була. “Әдәби нурлар” Татарстанның барлык мәктәпләренә дә җибәрелде. Шулай ук без аның махсус сайтын да булдырдык. Әдәби әсәрне укыганнан соң, анда кереп төрле сорауларга интерактив җавап бирергә мөмкин. Бу чит төбәкләрдәге татар теле укытучыларын һәм татар балаларын күздә тотып эшләнде”, – дип белдерде Алсу Низамиева.

Укытучылардан һәм укучылардан уңай кайтавазлар да килә башлаган. Әлеге менталь карталар татар теле һәм әдәбияты буенча уздырылучы олимпиадаларга әзерлек вакытында да булыша икән.

“Татармультфильм” берләшмәсе үзләрендә чыгарылган әсбапларны чит төбәкләргә дә җибәрәләр. “Без аларга “Тамырлар” исемле плакатларны бушлай җибәрдек. “Әдәби нурлар” турында укытучыларга мәгариф министрлыгы һәм Бөтендөнья татар конгрессы аша җиткердек. Бездә эшләнә торган проектларны ничек итеп дөрес файдаланырга кирәклеген өйрәтүче кулланмалар да язабыз ”, – ди Алсу Низамиева.

Сүз уңаеннан, хәзерге вакытта Татарстанда “Яшьләр һәм балалар” илкүләм проекты гамәлгә ашырыла.