Алматы мен Нұр-Сұлтанда тұрғын үй салу қарқыны шектеледі. Индустрия және инфрақұрылымдық даму министрлігінде LS-ке егжей-тегжейін айтты.
Министрліктің мәліметінше, шектеулерді енгізу қалалардың инженерлік жүйелері жаңа ғимараттардың жүктемесіне төтеп бере алмайтындықтан жоспарлануда.
Осыған байланысты, егер Алматыда 2022 жылы 3,4 млн шаршы метр тұрғын үй салу жоспарланса, онда жаңа ұсыныс бойынша бұл көрсеткіш 1,5 млн шаршы метрден аспауы тиіс. Нұр-Сұлтанда жоспарланған 2,3 млн шаршы метрден 2 млн шаршы метрге дейін. Бұл қалаларда жыл сайынғы өсім 10%-ға дейін болуы шарт. Министрлік шектеулерді президент Қасым-Жомарт Тоқаев қолдағанын атап өтті.
"Осыған байланысты республика бойынша тұрғын үй салудың жалпы республикалық көлемін азайтуға қайта есептеу жүргізілді. Нұр-Сұлтан және Алматы қалалары мен қалған өңірлерде тұрғын үйді пайдалануға берудің түзетілген жылдық жоспарлы көлеміне жалпы ағымдағы жылдың соңына дейін қол жеткізу қажет",- деп толықтырды ИИДМ-де.
Министрлікте атап өткендей, бұл қалаларда инженерлік инфрақұрылым, ауыз су, жылу және электрмен жабдықтау, кәріз және нөсер ағындарын бұру, сондай-ақ, энергия көздерінің тапшылығы сақталуда, әлеуметтік инфрақұрылым объектілерін орналастыру үшін бос жер учаскелері жоқ.
"Сонымен қатар, Нұр-Сұлтан және Алматы қалаларының әкімдіктері мемлекет басшысына тұрғын үй құрылысына қатысты бірқатар проблемаларды тізбектеген болатын", — деп нақтылады министрлікте.
2022 жылдың басында Нұр-Сұлтанда халық саны 1,24 млн адамды құрады. 2025 жылға қарай елордалықтар 1,48 млн (+240 мың адам) болады деп күтілуде. Алматыда – 2,17 млн адамға дейін өсуі мүмкін 2,02 млн адам (+150 мың адам).
Халықтың осындай өсуімен Нұр-Сұлтанда 2025 жылға қарай 11,48 млн ш.м., ал Алматыда – 4,38 млн ш. м. үй салыну қажет.
Елордада су тұтыну тәулігіне 155 мың текше метрге өседі (қазір 305 мың текше метр). Алматыда өсім 336,2 мың текше метрді құрайды (қазір 655,8 мың текше метр).
Нұр-Сұлтандағы ағымдағы қажеттілікті ескере отырып, тазартуды талап ететін сарқынды сулардың көлемі жылына 188 млн текше метрді, Алматыда жылына 233,6 млн текше метрді көрсетіп тұр.
Жаңа құрылысқа электрмен жабдықтау қажеттілігі елордада жылына 8 млрд кВтс және Алматыда жылына 1 млрд кВтс. Нұр-Сұлтан қаласындағы жаңа құрылысты жылумен жабдықтаудағы тапшылығы ағымдағы жағдайды ескере отырып, 53,6 млн Гкал құрайды.
Алматының жаңа құрылысын газбен жабдықтау жылына 98 млн текше метрге жетеді.
"Жақын арада аумақтық даму тұжырымдамасы бекітіледі. Оның шеңберінде тұрғын үй саясатын одан әрі дамыту көзделіп отыр. Ағымдағы жылдан бастап жер ресурстарын тиімді пайдалану, көше-жол желісін дамыту және қоғамдық кеңістіктердің сапасын арттыру есебінен "шаршы метр құрылысынан" жайлы өмір сүру ортасын қалыптастыруға көшу жоспарлануда", — деп хабарлады ИИДМ-де.
Сондықтан аталмыш қалаларда құрылыс жүргізудің кешенді жаңа стандарттары әзірленбек. Биылғы жылы мемлекеттің бақылауымен құрылыс және жобалау бойынша өзін-өзі реттеу жүйесі енгізілмек.
