Total мұнай-газ компаниясы бес жыл ішінде Қазақстанға 70 млрд теңге инвестициялауды жоспарлап отыр, деп хабарлайды LS.
Энергетика министрі Мағзұм Мырзағалиевтің айтуынша, Маңғыстау облысының 2021-2025 жылдарға арналған даму жоспары аясында келесі іс-шаралар жүргізіледі.
"Біріншіден, Total компаниясымен Дунга кен орны бойынша өнімді бөлу туралы шартты 2024 жылдан 2039 жылға дейін ұзартуға қол қойылды. Оның орнына Total 2021-2025 жылдары шамамен 70 млрд теңге инвестициялайды, бұл нәтижесінде мұнай өндіру деңгейін 25%-ға арттыруды қамтамасыз етеді", — деді ол.
Осылайша, өндіру өсімі қазіргі 680 мың тоннадан жылына 860 мың тоннаға дейін жетеді. Осының арқасында, құрылыс жұмыстарының шыңында 400-ге жуық жұмыс орны ашылады.
"Екіншіден, "Қазмұнайгаз" компаниясы Өзен, Жетібай және Қаламқас кен орындарына іргелес учаскелерде қосымша геологиялық барлау жұмыстарын жүргізеді. Мәселен, Шығыс және Өзен-Қарамандыбас Бектұрлы аумақтарында 26 млрд теңгеге (13,3 млрд теңге – бірінші учаске, 12,6 млрд теңге – екінші учаске) жұмыстар жүргізу жоспарлануда", — деп нақтылады министр.
Үшіншіден, өңірде мұнай өндірудің төмендеуіне жол бермеу үшін ведомство мен "Қазмұнайгаз" компаниясы мүдделі мемлекеттік органдармен бірлесіп, Маңғыстау облысының аумағында орналасқан рентабельді емес, суландырылған, дебиті аз кен орындары бойынша салықтық преференциялар беру жөнінде ұсыныстар пысықтайтын болады (аяқталу мерзімі – 2022 жыл).
Бұдан басқа, облыстың даму жоспарында "МАЭК-Қазатомөнеркәсіпті" дамытудың 2022-2030 жылдарға арналған стратегиясын әзірлеу көзделген.
"Бұл жабдықты күтіп ұстау мен техникалық қызмет көрсету шығындарын азайтуға, электр станцияларының сенімділігін, маневрлігін арттыруға және негізгі жабдықтың пайдалану мерзімін арттыруға мүмкіндік береді. Сондай-ақ, стратегия БН-350 реакторлық қондырғысын қауіпсіз шығаруға және радиоактивті қалдықтарды қайта өңдеуге бағытталатын болады", — деп түсіндірді Мырзағалиев.
Сонымен қатар, Ақтауда үш қосалқы станцияның құрылысы жүріп жатыр, оларды іске асыруға 2021-2022 жылдары 9,2 млрд теңге қарастырылған. Олар жобаланып жатқан жалпы қалалық орталықтың және қалаға іргелес елді мекендердің жаңа шағын аудандарының тұрғындарын электр энергиясымен қамтамасыз етуге мүмкіндік береді.
Өз кезегінде индустрия және инфрақұрылымдық даму министрі Бейбіт Атамқұлов өңірдің өнеркәсіптік дамуы үшін "Ақтау теңіз порты" ЕЭА аумағында №2 және №4 субаймақтың инфрақұрылымын салу жоспарланғанын айтты.
"Бұл мақсаттарға 2023-2025 жылдар аралығында 9,6 млрд теңге көлемінде қаражат бөлу жоспарланған", — деді ол.
Қазіргі уақытта еркін экономикалық аймақ тоғыз жеке орналасқан субаймақтан тұрады, олардың бесеуі инфрақұрылыммен қамтамасыз етілген.
"Субзон инфрақұрылымын аяқтау оларды 327 млрд теңге сомасына инвестициялар тарта отырып, 1,2 мың жұмыс орнын құра отырып, жобалармен толықтыруға мүмкіндік береді. Жобаларды іске асыру өңір экономикасын әртараптандыру, қосымша жұмыс орындарын құру, бюджетке түсетін түсімдерді ұлғайту жолымен мультипликативті әсер етеді", — деп есептейді ол.
Жалпы, бюджеттік инвестициялардың бір теңгесіне 13,1 теңге жеке қаражат тартылатын болады, деп болжайды Атамқұлов.
Бұған дейін, ОПЕК+ аясында қазан айында өндіруді тәулігіне 400 мың баррельге жоспарлы ұлғайтуды өзгертпеу туралы келісімдерге қол жеткізілгені хабарланған болатын. Бұл ретте Қазақстанда геологиялық барлауды қаржыландыруды 30%-ға арттыру жоспарлануда.
