Қызылорда облысында 2,5 млрд теңгенің сегіз жобасы іске қосылды. Бұл туралы LS-ке өңірлік әкімдікте хабарлады.

Ақпаратқа сәйкес, жаңа нысандарды қазақстандық компаниялар 2021 жылдың І жартыжылдығында іске қосты. Бұл өндірістерге салынған инвестициялардың жалпы көлемі 2,5 млрд теңгені құрады.

Қызылордада қымыз бен ет өңдейтін зауыт салынып, ашылды. Жобаны жүзеге асыруға 111 млн теңге жұмсалды. Кәсіпорынның қуаттылығы жылына 4,2 мың тоннаны құрайды. Сондай-ақ, қалада өсімдік шаруашылығында 300 млн теңгеге жоба жүзеге асырылды. Әкімдіктің мәліметінше, өңірде күрішті жапон технологиясы бойынша өсіре бастаған. Жобаның жыл сайынғы қуаттылығы – жылына 3,2 мың тонна.

Жаңақорған ауданында бес жоба іске қосылды. Инвестицияның жалпы көлемі 2 млрд теңгеге жетті. Атап айтқанда, 525 млн теңгеге 25 га алма бағы салынды. Мұнда жылына 500 тонна жеміс жинау жоспарланған. Сонымен қатар, сервистік-дайындау орталығы салынып, 100 га жерге қызанақ отырғызылды. Тағы жалпы сомасы 159 млн теңгеге екі бал өндірісі жолға қойылып, 62 млн теңгеге асыл тұқымды шаруашылық құрылды.

Қазалы ауданында 87 га жерге жаңбырлатып суару арқылы жүгері өсіріле бастады, осы жобаны іске асыру есебінен жылына 5,2 мың тонна сүрлем өндірісі жолға қойылды. Әкімдікте бұл жобалардың ашылуы өңірде 60 жұмыс орнын құрғанын атап өтті.

Бұған дейін аймақ басшысы Гүлшара Әбдіқалықова Қызылорда облысының экономикасы 456 млрд теңгеден астам инвестиция ала алатынын айтқан болатын. Оның сөзінше, 2020-2025 жылдарға 543 млрд теңгенің 41 жобасын жүзеге асыру жоспарланған. 7 мыңнан астам адам жұмысқа орналаса алады. Әбдіқалықова биыл 48,5 млрд теңгенің тағы төрт жобасын жүзеге асыру аяқталатынын айтты. Мысал ретінде әкім Шалқия кен орнында тау-кен байыту комбинаты мен кальцийленген сода шығаратын зауыт құрылысының басталғаны туралы айтты.

Шыны зауытының биылғы жылға жоспарланған 42,1 млрд теңгеге іске қосылуына келетін болсақ, жоба 81,4%-ға аяқталды. Әбдіқалықова өңірге қазірдің өзінде 49 шетелдік маман келгенін айтты.

Сонымен қатар, 2021-2025 жылдары агроөнеркәсіптік кешенде 58 млрд теңгеге 76 жобаны ашу көзделген. Атап айтқанда, биыл ауыл шаруашылығы өнімдерін қайта өңдеу бойынша жеті өндіріс, өсімдік шаруашылығында алты жоба, мал шаруашылығында алты жоба, құс және балық шаруашылығында бір-бірден.